ភ្នំពេញ៖ រដ្ឋបាលរាជធានីភ្នំពេញ បានណែនាំដល់ប្រជាពលរដ្ឋ គណៈគ្រប់គ្រងគ្រឹះស្ថានសិក្សា គណៈកម្មការផ្សារ ម្ចាស់អាជីវកម្ម អាហារដ្ឋាន អាជីវករ វិស័យឯកជន និងសាធារណជន ទាំងអស់ ត្រូវមានកាតព្វកិច្ចបង្ហាញ និងត្រួតពិនិត្យបណ្ណចាក់វ៉ាក់សាំងកូវីដ-១៩ ឬ លិខិត បញ្ជាក់ការចាក់វ៉ាក់សាំងបង្ការជំងឺកូវីដ-១៩ រាល់ពេលចេញ-ចូលគ្រឹះស្ថានសិក្សា ផ្សារ និងទីតាំងអាជីវកម្មដ្ឋាននានា ក្នុងរាជធានីភ្នំពេញ។

ក្នុងសេចក្ដីណែនាំចុះថ្ងៃទី៥ ខែកញ្ញានេះ សាលារាជធានីភ្នំពេញបានណែនាំទៅដល់ម្ចាស់ទីតាំងខាងលើឲ្យដាក់បុគ្គលិកដើម្បីត្រួតពិនិត្យមើលបណ្ណចាក់វ៉ាក់សាំងឬលិខិតបញ្ជាក់ថាចាក់វ៉ាក់សាំងចំពោះអ្នកដែលបានចេញចូលទីតាំងអាជីវកម្មរបស់ខ្លួន លើកលែងតែកុមារអាយុ៦ឆ្នាំចុះ។

ក្នុងករណីអ្នកចេញចូលណាម្នាក់មិនព្រមសហការបង្ហាញបណ្ណចាក់វាក់សាំង ដាច់ខាតមិនត្រូវអនុញ្ញាតឱ្យចូលក្នុងទីតាំង ឬទីកន្លែងរបស់ខ្លួនឡើយនិងត្រូវរាយការណ៍ទៅអាជ្ញាធរមូលដ្ឋានដែលនៅក្បែរនោះជាបន្ទាន់។

សាលារាជធានីភ្នំពេញក៏ព្រមានដកហូតអាជ្ញាប័ណ្ណឬលិខិតអនុញ្ញាតនិងអាចឈានរហូតដល់បិទទីតាំងព្រមទាំងចាត់វិធានការផ្លូវច្បាប់ផងដែរ។ប្រសិនជាម្ចាស់អាជីវកម្មខាងលើមិនអនុវត្តតាមការណែនាំនេះ៕